Deputetët e LVV-së i kundërpërgjigjen ‘Guxo-s’ për postin e ministrit të Shëndetësisë
Deputeti i LVV-së, Artan Abrashi i është kundërpërgjigjur kolegut të tij që vjen nga ‘Guxo’, Burim Meta, i cili pas dorëheqjes së ministrit Rifat Latifi, tha se ky post duhet t’i takojë partisë së tij.
Lidhur me këtë kërkesë të Metës, Abrashi theksoi se për partinë në pushtet nuk është i rëndësishëm emri i personit që do ta zë vendin e ministrit të Shëndetësisë por substanca.
“Respekt për kolegun tonë, por si LVV për ne nuk është i rëndësishëm emri e mbiemri apo nominimi i personit nga ndonjë subjekt i caktuar, por përmbushja e premtimeve tona elektorale që i kemi pasur për sektorin e shëndetësisë”, tha ai në Debat Plus.
Kurse, deputeti Adnan Rrustemi u shpreh se është në përgjegjësi të kryeministrit Albin Kurti zëvendësimi i ministrit të Shëndetësisë.
