Klan Kosova ka paditur Albin Kurtin për shpifje dhe fyerje

Reagimi i Klan Kosovës:

Klan Kosova po e përcjell me shqetësim të madh degradimin e gjuhës së Kryeministrit në detyrë, z. Albin Kurtit, ndaj mediave.

Një rast i ri i sjelljes së papranueshme u pa edhe sot ndaj gazetares sonë, znj. Arbëreshë Uka, derisa ajo po e bënte detyrën e saj, në të mirë të informimit të opinionit publik.

Gazetarja i ka shtruar z. Kurti pyetje për mungesën e barnave në QKUK, kurse ai, në mungesë të përgjigjes, e ka udhëzuar gazetaren të bëjë veprime të tjera, duke thënë: „Lej ti albuminat, thuj pronarit tuaj, televizionit tuaj le t’ia kthejë 62.6 milionë Telekomit“.

Përveçse, gjuha e Kryeministrit në Detyrë ndaj një gazetareje profesionale është krejtësisht e dënueshme, i njëjti në këtë rast ka bërë edhe shpifje publike.

Klan Kosova nuk ka pasur dhe as nuk ka asnjë marrëdhënie të atillë me Telekomin.

Klan Kosova asnjëherë nuk ka pasur asnjë kontest me Telekomin, gjegjësisht asnjëherë nuk i kanë pasur njëra-tjetrës obligime të pashlyera financiare. Kjo çështje është lehtë e verifikueshme për secilin që ka interesim.

Z. Kurti, me qëllim, dhe jo për herë të parë, shpik tema për t’i ikur ballafaqimit me mediat dhe llogaridhënien ndaj opinionit.

Klan Kosova, më 16 maj, ka ndërmarrë edhe hapa ligjorë ndaj qasjes së z. Kurti, duke dorëzuar padi ndaj Kryeministrit të Detyrë, për fushatën e vazhdueshme të shpifjeve dhe fyerjeve.

Qasja e sotme e tij ndaj gazetares Uka presim të vlejë si argument shtesë për organet gjyqësore për fushatën e pandalshme të z. Kurti ndaj medias në përgjithësi dhe Klan Kosovës në veçanti.