Përkujtohet Hiroshima – 80 vite më parë bombat bërthamore amerikane goditën Japoninë

Në orën 08:15 të mëngjesit me oren lokale, koha kur më 6 gusht 1945 avioni amerikan Enola Gay hodhi bombën “Little Boy”, u mbajt një lutje e heshtur. Të veshur me të zeza, zyrtarë, nxënës dhe të mbijetuar vendosën lule në memorialin për viktimat, pranë ndërtesës së shkatërruar që sot qëndron si simbol i dhimbjes së përjetshme. Kryetari i Hiroshimës, paralajmëroi për rritjen e tensioneve dhe garën ushtarake, ndërsa kryeministri japonez theksoi misionin e Japonisë për një botë pa armë bërthamore.

140 mijë njerëz humbën jetën në Hiroshimë, jo vetëm nga shpërthimi por edhe nga pasojat e rrezatimit. Tre ditë më vonë, një tjetër bombë atomike vrau 74 mijë persona në Nagasaki, dhe Japonia kapitulloi më 15 gusht. Në ceremoni morën pjesë përfaqësues nga 120 vende, përfshirë për herë të parë Taiwanin dhe Palestinën. SHBA u përfaqësua nga ambasadori i saj, ndërsa Rusia dhe Kina munguan.

Sot, vetëm 99 mijë të mbijetuar të bombës janë gjallë, me një moshë mesatare prej 86 vjeç. Ata dhe pasardhësit e tyre vazhdojnë të vuajnë pasojat. Sekretari i Përgjithshëm i OKB-së, Antonio Guterres, paralajmëroi se armët që shkaktuan shkatërrim në Hiroshima e Nagasaki, sot po përdoren sërish si mjet presioni. Ndërsa Ora e Fundit është vendosur në 89 sekonda nga mesnata, niveli më i rrezikshëm në histori.

Sipas SIPRI, rreth 90% e mbi 12 mijë kokave bërthamore në botë janë në duart e SHBA-së dhe Rusisë. Instituti paralajmëron për një garë të re armatimesh bërthamore në një kohë kur marrëveshjet për kontrollin e armëve janë dobësuar rëndë.

Hiroshima, sot një qytet i gjallë me 1.2 milionë banorë, mbetet simbol i paqes dhe thirrje për t’i dhënë fund armëve që kërcënojnë njerëzimin.