Gjermani, dy vëllezër kosovarë akuzohen për tentativë vrasjeje

Një përleshje banale përfundoi me një sulm brutal që për pak sa nuk i mori jetën një burri. Të martën, në Gjykatën Rajonale të Düsseldorf-it nisi gjyqi kundër dy vëllezërve me origjinë nga Kosova, F (34) dhe A (48), të akuzuar për tentativë vrasjeje. Në qendër të çështjes: një goditje me hanxhar në kokën e viktimës I (37), që ka lënë një shenjë 15 cm të gjatë dhe 28 qepje.

Ngjarja ndodhi në tetor të vitit 2024, pas një përplasjeje verbale në një kioskë në pronësi të F. Sipas prokurorisë, I. kishte pështyrë në trotuarin përpara kioskës, duke nxitur një debat të ashpër me pronarin. Grindja shpejt u përshkallëzua në shtyrje dhe grushte, derisa F thirri në ndihmë vëllain e tij më të madh, A – moment që shënoi edhe fillimin e gjakderdhjes.

Sipas dëshmisë së dhënë në sallën e gjyqit nga viktima, A. doli nga makina me një hanxhar në dorë, dhe e sulmoi brutalisht atë. “Ma preu dorën, shpinën dhe më pas më goditi në kokë”, rrëfeu I., i cili punon me kohë të pjesshme si roje sigurie. Goditja e fundit i plasi kafkën. “Ishte si një rrufe, ndjeva të ftohtë dhe mendova se ishte fundi për mua.”

Ai përfundoi në spital me frakturë në kafkë dhe prerje të thella në trup. Kirurgët i vendosën 28 qepje në kokë dhe e shpëtuan me një ndërhyrje urgjente. Ndërkohë, A. u arratis jashtë vendit, por u arrestua më vonë dhe aktualisht ndodhet në paraburgim.

Në ditën e parë të seancës, të pandehurit pretenduan se vepruan në vetëmbrojtje. Sipas tyre, I. kishte qenë agresor dhe kishte sulmuar i pari. Ata deklaruan se A. kishte ndërhyrë vetëm për të mbrojtur vëllain e tij dhe se goditja në kokë ndodhi aksidentalisht, pasi I u përkul papritur.

Ndërkohë, sfondi i konfliktit duket të jetë më i thellë. Sipas informacioneve të gjykatës, konflikti mes palëve ka rrënjë në një mosmarrëveshje të mëhershme mes viktimës dhe vjehrrës së tij, e cila kishte punuar më parë në kioskën e të pandehurve. Ajo ishte pushuar nga puna për shkak të dyshimeve për përfshirje në aktivitete të paligjshme dhe që nga ajo kohë kishte ndikuar në krijimin e tensioneve në lagje.

Gjyqi pritet të zgjasë njëmbëdhjetë ditë dhe do të shqyrtojë në detaje rrethanat e sulmit, që nga shkaku banal deri te pasojat tragjike. A do të cilësohet veprimi i vëllezërve si vetëmbrojtje apo si tentativë për vrasje me paramendim – kjo mbetet në dorën e trupit gjykues, që pritet të japë vendimin përfundimtar në muajin shtator.