Mosmarrëveshja për kanalizim përfundon me të shtëna

Një konflikt për çështje kanalizimi në Malishevë ka përfunduar me kërcënime dhe përdorim arme, duke rezultuar në arrestimin e dy personave dhe sekuestrimin e një pistolete me gas.

Rasti është raportuar më 10 gusht 2025, rreth orës 14:00, në një rrugë të qytetit.

Sipas hetimeve, mosmarrëveshja e mëhershme mes palëve ka eskaluar në përleshje fizike, kërcënime dhe të shtëna me armë.

Në vendngjarje policia ka gjetur 7 gëzhoja dhe 4 fishekë që dyshohet t’i përkasin një pistolete me gas.

Pas sigurimit të provave, është identifikuar personi që dyshohet se ka përdorur armën. Fillimisht, gjatë bastisjes në shtëpinë e tij nuk është gjetur asgjë, por më pas ai ka treguar vendin ku e kishte fshehur armën – një pistoletë me gas e tipit Zoraki 917-8 me 7 fishekë, e cila është sekuestruar si dëshmi materiale.

Me urdhër të prokurorit, rasti është iniciuar si “Vetëgjyqësi”, “Kanosje”, “Përdorim i armës” dhe “Mbajtje në pronësi, kontroll ose posedim të paautorizuar të armëve”. Dy personat e arrestuar janë ndaluar për 48 orë dhe dërguar në Qendrën e Mbajtjes.