48 orë ndalim për dasmorin që shtiu me armë
Një aheng familjar në lagjen “Kurtish Hasani” të Prizrenit u shoqërua me të shtëna armësh, duke mobilizuar policinë të dielën pasdite.
Sipas informacioneve zyrtare, gjuajtjet ishin bërë nga krushqit e ardhur nga Vushtrria. Patrullat në Prizren nuk arritën t’i kapnin në vendngjarje, por pas njoftimit, policia e Vushtrrisë ndaloi veturën BMW me të cilën po udhëtonte i dyshuari rreth 60-vjeçar.
I dyshuari u shoqërua fillimisht në stacionin policor të Vushtrrisë e më pas në atë të Prizrenit, ku me urdhër të prokurorit u ndalua për 48 orë.
Në cilësinë e provave materiale, policia ka sekuestruar një armë të tipit “Blow”, 7 fishekë, 10 gëzhoja dhe një karikator. Rasti është iniciuar për “Posedim i armës” dhe “Përdorimi i armës apo mjetit të rrezikshëm”.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
