Ekskluzive: Ky është shoferi i ndaluar për aksidentin me një të vdekur dhe tetë të lënduar në Komoran

Një aksident i rëndë komunikacioni, i ndodhur mbrëmjen e djeshme rreth orës 18:15 në Rrugën Nacionale Pejë–Prishtinë, në Komoran, ka marrë jetën e Mirvedete Sukës, 62-vjeçare.

Në përplasjen zinxhir, ku u përfshinë gjashtë automjete, përveç viktimës që humbi jetën në vend, edhe tetë persona të tjerë kanë pësuar lëndime trupore.

Për rastin siç merr vesh Gazeta Sinjali është ndaluar Rinor Krasniqi, si i dyshuar.

Sipas të dhënave të para, aksidenti dyshohet se ndodhi si pasojë e mospërshtatjes së shpejtësisë, duke shkaktuar përplasje të njëpasnjëshme në qendër të Komoranit.

Njësitë policore dhe ato të hetimeve dolën menjëherë në vendngjarje, së bashku me Prokurorin Kujdestar, kompaninë për mirëmbajtjen e autostradës dhe ekipet për tërheqjen e automjeteve.

Me urdhër të prokurorit, trupi i pajetë i viktimës është dërguar në Institutin e Mjekësisë Ligjore, ndërsa personi i dyshuar, pas trajtimit mjekësor, është ndaluar për 48 orë.