19 raste të reja me HIV/AIDS në Kosovë gjatë këtij viti, shënohet edhe një vdekje
Instituti Kombëtar i Shëndetit Publik (IKSHPK) ka njoftuar se gjatë vitit 2025 janë regjistruar 19 raste të reja me HIV/AIDS në Kosovë. Nga personat e testuar pozitivë, 16 janë meshkuj dhe tri femra.
Gjithashtu, IKSHPK raporton për një rast vdekjeje si pasojë e AIDS-it gjatë këtij viti.
Që nga viti 1986 e deri më 2025, në Kosovë janë regjistruar gjithsej 234 raste me HIV/AIDS dhe 53 vdekje që lidhen me këtë sëmundje, njofton Instituti.
“Rastet e HIV/AIDS në Kosovë, Janar–Korrik 2025: 19 raste të reja me HIV/AIDS (16 raste të gjinisë mashkullore, 3 raste të gjinisë femërore); 1 rast vdekjeje si pasojë e AIDS-it. Në periudhën 1986–2025; 234 raste gjithsej; 53 vdekje si pasojë e AIDS-it.
Çfarë duhet të dini? HIV është virus që sulmon sistemin imunitar dhe, nëse nuk trajtohet, çon në AIDS – fazën më të rëndë të infeksionit. Nuk ka shërim, por me trajtim të rregullt, personat HIV pozitiv mund të jetojnë gjatë dhe shëndetshëm, si dhe të mos e bartin virusin tek të tjerët”, ka theksuar IKSHPK-ja.
