Xhevdet Maloku sërish kandidon nga VV për asamble

Xhevdet Maloku ka bërë të ditur se do të rikandidojë për një mandat të dytë si asambleist në Kuvendin Komunal të Podujevës, në listën e Lëvizjes Vetëvendosje me kryetarin Shpejtim Bulliqi.

Ai ka theksuar se gjatë mandatit të parë ka qenë ndër asambleistët më të zëshëm dhe më aktiv, sipas raporteve të organizatave të shoqërisë civile që monitorojnë punën e Kuvendit, duke u angazhuar për transparencë, zhvillim dhe të drejtat e qytetarëve.

“Për mua, politika nuk është privilegj, por shërbim dhe përgjegjësi ndaj qytetarëve. Me përkushtim edhe më të madh, jam gati të vazhdoj këtë rrugëtim bashkë me ju — për një Podujevë më të zhvilluar, më të drejtë dhe më të mirë për të gjithë,” ka deklaruar Maloku.

Ai ka falënderuar Këshillin e Vetëvendosjes në Podujevë për besimin dhe ka ftuar qytetarët ta mbështesin edhe në zgjedhjet e ardhshme.