Besim Latifi kandidon për Asamblenë Komunale të Podujevës në listën e LDK-së

Besim Latifi ka shpallur zyrtarisht kandidaturën e tij për Asamblenë Komunale të Podujevës, duke u renditur në pozitën e dytë në listën e Lidhjes Demokratike të Kosovës, të udhëhequr nga dr. Ekrem Hyseni.

Me mbi 12 vite përvojë në fushën e arsimit si Sekretar në IAAP “Fan S. Noli” dhe me angazhim të pandërprerë si Sekretar i Degës së LDK-së në Podujevë, Latifi thotë se është i përkushtuar për të vendosur arsimin në qendër të prioriteteve.

“Do të angazhohem që arsimi të mos jetë vetëm ndërtesa e objekte, por dije cilësore, kushte moderne, laboratorë funksionalë, staf të trajnuar dhe përgatitje serioze për të ardhmen e nxënësve tanë,” ka theksuar ai.

Latifi ka premtuar një qeverisje të ndershme dhe të përgjegjshme, me menaxhim transparent të buxhetit dhe investime të barabarta për qytetin dhe fshatrat, duke mos lënë askënd pas.

Ai është zotuar të jetë zëri i qytetarëve brenda Kuvendit Komunal, duke adresuar shqetësimet dhe padrejtësitë që ka evidentuar gjatë viteve.

“Me përkrahjen tuaj, jam i bindur se do ta bëjmë Podujevën shembull të qeverisjes së ndershme, të përgjegjshme dhe të zhvillimit të qëndrueshëm,” ka deklaruar Latifi.