Produkte të mishit, rriska gjedhi e çokollata të Serbisë, parandalohet kontrabandimi

Kontrabandimi i mallrave të ndryshme nga Serbia në Kosovë vazhdon të jetë një nga sfidat kryesore për autoritetet e rendit. Vetëm gjatë ditës së djeshme, Policia e Kosovës, në bashkëpunim me Doganën, ka arritur të ndalojë dy raste të tilla në rajonin e Gjilanit, duke sekuestruar mallra me vlerë mbi 20 mijë euro.

Sipas njoftimit zyrtar, rasti i parë është regjistruar më 13 gusht në rrugën Pozhoran–Sllatinë–Viti, ku njësitë e Task Forcës kanë ndaluar një automjet të dyshuar që kishte hyrë nga Maqedonia e Veriut në drejtim të Kosovës.

Pas kontrollit, janë gjetur mallra për të cilat drejtuesi nuk kishte dokumentacion doganor: 3,000 copë produkt mishi të përpunuar, prodhim i Serbisë, 750 copë rrisk gjedhi, prodhim i Serbisë dhe 15,840 pako çokollata, prodhim i Serbisë.

Rasti i dytë është zbuluar në rrugën Viti–Gerlicë, ku pas ndalimit të një automjeti tjetër, policia ka gjetur sasi të konsiderueshme farash të bardha e të zeza të ambalazhuara në thasë.

Gjatë kontrollit në një depo që i përkiste të dyshuarit, është zbuluar edhe një sasi shtesë e mallit pa dokumentacion të rregullt.

Autoritetet bëjnë të ditur se shmangia e detyrimeve doganore në të dy rastet kap shifrën mbi 5 mijë euro. Mallrat janë sekuestruar nga Dogana e Kosovës për procedura të mëtejshme.