Bilanci i katastrofës së zjarreve në Mesdhe nga Turqia në Spanjë

Vendet e Mesdheut po përballen me një sezon të ashpër zjarresh, me dhjetëra vatra aktive që kanë djegur mijëra hektarë dhe kanë detyruar autoritetet të ndërmarrin evakuime masive.

Sipas të dhënave të përditësuara, deri tani janë konfirmuar 24 viktima, ndërsa mbi 65 mijë persona janë evakuuar në gjithë rajonin.

Turqi – Që nga muaji qershor janë evakuuar mbi 50 mijë banorë në Izmir dhe zonat përreth. Mes viktimave raportohen edhe pjesëtarë të ekipeve të zjarrfikësve dhe të shpëtimit gjatë ndërhyrjeve në terren.

Greqi – Është raportuar humbja e jetës së një personi të moshuar në Keratea, ndërsa mijëra banorë e turistë janë evakuuar në ishujt dhe rajonet: Chios, Kreta, Attica, Evia, Kythira dhe Messenia.

Spanjë – Një zjarrfikës vullnetar ka humbur jetën gjatë operacioneve në Kastilje; mbi 5 mijë persona janë evakuuar. Vatra të fuqishme janë regjistruar në Castile y León, Galicia dhe Madrid.

Itali – Zjarret kanë prekur edhe Parkun Kombëtar të Vezuvit në Napoli, duke larguar turistët për arsye sigurie.

Meteorologët theksojnë se temperaturat e larta të shoqëruara me erëra të forta po e vështirësojnë punën e ekipeve të emergjencës.

Autoritetet u bëjnë thirrje qytetarëve të shmangin ndezjen e zjarreve në natyrë dhe të raportojnë menjëherë çdo vatër të dyshimtë.