Rrahje brutale mes të rinjve në Sunny Hill – një arrestohet, një në arrati

Sinjali mëson se një përleshje e rëndë që ka ndodhur në orët e vona të 2 gushtit, në fshatin Bernicë e Poshtme, në festivalin Sunny Hill, në Prishtinë, ku dy të rinj kanë përfunduar me lëndime serioze dhe në spital, është zbardhur si rast nga Policia.

Siç mëson Sinjali, rreth orës 23:30, L. A. 24-vjeçar ka denoncuar në polici se ai dhe O.E, 20-vjeçar u sulmuan brutalisht nga disa persona, duke marrë goditje të shumta dhe duke pësuar lëndime të rënda trupore. Të dy janë trajtuar menjëherë në spital për plagët e marra.

Pas hetimeve, më 13 gusht policia ka arritur të sigurojë prezencën e njërit nga të dyshuarit, Rrezart Svirca, 20-vjeçar, i cili është intervistuar në prani të avokatit dhe, me urdhër të prokurorit kujdestar, është ndaluar për 48 orë.

Personi tjetër i përfshirë në sulm, E.R. 19-vjeçar, është ende në kërkim policor dhe po kërkohet nga njësitë e rendit.

Hetimet po vazhdojnë, ndërsa Sinjali mëson se arrestimi i të dyshuarit të dytë është çështje kohe.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.