Ekskluzive: Ky është i arrestuari për sulm seksual

Një rast i rëndë është raportuar sot në Zveçan, ku një grua ka denoncuar në Polici se është sulmuar seksualisht dhe i është demoluar vetura nga një person, i cili aktualisht është në arrati.

Burime të Sinjalit brenda hetimit bëjnë të ditur se viktima, e identifikuar si V. D. rreth 47-vjeçare, me banim në Zveçan, ka raportuar se sot rreth orës 07:30, derisa po dilte nga banesa e saj, është ndalur nga një person i cili iu prezantua me emrin “Slobo”. Më vonë, ajo ka kuptuar se bëhej fjalë për Slobodan Cmiljković rreth 33-vjeçar, nga fshati Velishtë – Zveçan, me të cilin më parë kishte pasur komunikim në rrjetet sociale, por e kishte ndërprerë pasi kishte zbuluar identitetin e tij të vërtetë.

Sipas dëshmisë së saj, i dyshuari e ka ndjekur deri te vetura e saj Renault Clio, ku ka filluar ta godasë me shqelma dhe më pas e ka shtyrë atë në ulësen e pasagjerit, duke hipur vetë në timon dhe duke drejtuar automjetin në drejtim të fshatit Korilje. Gjatë rrugës, ai e ka kërcënuar se do t’i digjte shtëpinë dhe veturën nëse nuk pranonte të kryente marrëdhënie seksuale me të.

Kur kanë arritur në një pikë të fshatit, i dyshuari ka ndaluar veturën dhe ka tentuar ta prekë në pjesë intime, por viktima ka arritur të dalë nga automjeti dhe të kërkojë ndihmë në një shtëpi aty pranë. Një qytetar e ka transportuar atë deri në stacionin policor.

Ndërkohë, i dyshuari, para se të largohej, ka vazhduar ta demolonte veturën duke thyer të gjitha xhamat dhe duke shkaktuar dëme të konsiderueshme materiale.

Prokurori i Shtetit ka urdhëruar hapjen e tre rasteve penale ndaj tij: “Sulm seksual”, “Asgjësim apo dëmtim i pasurisë” dhe “Marrja në posedim e pasurisë së luajtshme”. Policia ka kryer ekzaminimet në vendin e ngjarjes dhe ka tentuar ta arrestojë në shtëpinë e tij në fshatin Velishtë, por i dyshuari nuk është gjetur.

Hetimet po vazhdojnë dhe Policia ka shpallur në kërkim Slobodan Cmiljković.

Shënim: Personat e apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.