A do të arrestohet Putin në ShBA?!

Në mars 2023, Gjykata Penale Ndërkombëtare (GJPN) lëshoi një urdhër arresti për Vladimir Putinin, i lidhur me krime lufte të pretenduara.

Ndërsa Presidenti Joe Biden e ka quajtur vazhdimisht Putinin një “kriminel lufte” dhe ka thënë se urdhri është i justifikuar, Shtetet e Bashkuara nuk janë palë në GJPN.

Presidenti Bill Clinton e nënshkroi Statutin e Romës – i cili krijoi gjykatën – në vitin 2000, por Senati amerikan nuk e ratifikoi kurrë këtë traktat, gjë që do ta bënte atë ligjërisht të detyrueshëm.

Dy vjet më vonë, Presidenti George W. Bush i dha fund zyrtarisht çdo përfshirjeje të SHBA-së me gjykatën, duke pretenduar se institucioni shkelte sovranitetin amerikan.

Kështu që, urdhrat e gjykatës nuk kanë asnjë vlefshmëri në tokën amerikane.

Administrata Trump ka qenë hapur armiqësore ndaj GJPN-së, duke sanksionuar madje disa zyrtarë të saj për hetimet që bënin ndaj ushtarëve amerikanë për krime lufte të pretenduara gjatë luftës në Afganistan.

Mungesa e juridiksionit të GJPN-së mund të jetë një nga arsyet pse rusët dhe amerikanët ranë dakord që takimi i së premtes të mbahet në Alaskë.

Megjithatë, vlen të theksohet se Putini vizitoi Mongolinë – një shtet që ka nënshkruar Statutin e Romës – në gusht 2023. Ai vend nuk u përball me asnjë pasojë për moszbatimin e urdhrit të arrestit gjatë vizitës së liderit rus.

Në fund të fundit, ligji ndërkombëtar është aq i zbatueshëm sa dëshirojnë ta zbatojnë qeveritë kombëtare – dhe liderët e tyre. Dhe në këtë rast, Presidenti Donald Trump dëshiron të takohet me Vladimir Putinin, dhe asgjë nuk e pengon që ta bëjë këtë sipas kushteve të tij.