Festina Musliu pjesë e listës së VV-së për Asamblenë Komunale

Festina Musliu është kandidate për Asamblenë Komunale të Mitrovicës së Jugut nga radhët e Lëvizjes VETËVENDOSJE, ku mban numrin 6 në listë.

Ajo ka ndërtuar përvojë të rëndësishme politike dhe institucionale përmes angazhimeve të saj si Sekretare e Rinisë së Lëvizjes VETËVENDOSJE! në Mitrovicë, Anëtare e Këshillit të Përgjithshëm, si dhe pjesë e ekzekutivit të Komunës së Leposaviqit. Përmes këtyre angazhimeve, Musliu ka arritur të kuptojë nga afër mekanizmat e qeverisjes lokale, sfidat e përditshme të qytetarëve dhe rrugët drejt zgjidhjeve të qëndrueshme.

Si vajzë e re me rrënjë të thella në Mitrovicë dhe me dashuri të sinqertë për qytetin dhe njerëzit e tij, ajo thekson se kandidimi i saj bazohet në bindjen se përfaqësimi nuk është privilegj personal, por përgjegjësi ndaj çdo qytetari.

Musliu shprehet e gatshme t’i shërbejë qytetit të saj me ndershmëri, përkushtim dhe vizion për një Mitrovicë që zhvillohet mbi bazat e barazisë, drejtësisë dhe mundësive të barabarta për të gjithë. Ajo beson se ndryshimi ndërtohet duke qenë pjesë aktive e proceseve vendimmarrëse dhe duke mos u tërhequr para sfidave.