Podujevë: Arrestohen dy të rinj, u kapën me drogë

Një rast i shitblerjes së substancave narkotike është zbuluar parmbrëmë në Podujevë, ku dy persona kanë përfunduar në prangat e policisë.

Ngjarja ka ndodhur më 17 gusht 2025, rreth orës 21:30, në rrugën “Bekim Lushaku”. Njësia e hetimeve gjatë patrullimit ka vërejtur një veturë të dyshuar, ndërsa njëri nga personat ishte afruar pranë rrethojave të një shtëpie, ku është parë duke marrë diçka nga një tjetër.

Policia ka ndaluar menjëherë njërin prej tyre, ku gjatë kontrollit janë gjetur dy qese të vogla marihuanë me peshë 1.19 gram, si dhe një bluarës për substancë narkotike.

Më pas, me pëlqimin e pronarit të shtëpisë, është kontrolluar prona dhe aty, pranë rrethojës, policia ka zbuluar 64.27 gram marihuanë të ndarë në qese të vogla dhe cigare të gatshme për konsum.

Të dyshuarit janë intervistuar në prani të avokatëve mbrojtës, ndërsa në konsultim me Prokuroren Kujdestare të Departamentit për Krime të Rënda, rasti është iniciuar si “Blerja, posedimi, shpërndarja dhe shitja e paautorizuar e narkotikëve”.

Për të dy është lëshuar aktvendim për ndalim, ndërsa në rast është përfshirë edhe Njësiti i Antidrogës në Prishtinë.