Ky është kosovari që u bë hero në Gjermani, u shpëton jetën 4 turistëve amerikanë

Një shqiptar nga Kosova ka treguar guxim dhe humanizëm të jashtëzakonshëm në Gjermani, duke shpëtuar jetën e katër turistëve amerikanë. Ngjarja ka ndodhur disa ditë më parë në Dortmund, në liqenin e njohur Phoenix-See.

Sipas mediave gjermane, bëhet fjalë për Burim Doberllukën, i cili nuk hezitoi asnjë çast kur pa rrezikun. Një varkë me pedale (tretboot) ku ndodheshin turistët amerikanë ishte përmbysur, duke rrezikuar seriozisht jetën e tyre.

Pa menduar dy herë, Burimi u hodh menjëherë në ujë dhe arriti t’i nxirrte një nga një në breg të sigurt katër personat që rrezikonin të mbyteshin. Veprimi i tij heroik ka marrë vëmendjen e mediave gjermane, të cilat e kanë cilësuar si shpëtimtarin e ditës.

Banorët dhe dëshmitarët në vendngjarje kanë treguar se falë reagimit të shpejtë të Doberllukës, është shmangur një tragjedi e madhe.