Pamje nga aksidenti i autobusit me udhëtarë nga Kosova në Gjermani ku mbetën të lënduar 30 persona

Pak minuta pas mesnatës, një aksident i rëndë trafiku raportohet të këtë ndodhur në autostradën A8 pranë Irschenbergut në Gjermani.

Siç raportojnë mediat në Gjermani, rreth orës 0.05 të mëngjesit, një autobus me 50 pasagjerë goditi një rimorkio kamioni të ngarkuar me perime. Kamioni, i drejtuar nga një shtetas polak 46-vjeçar, po udhëtonte për në Munih kur shoferi i autobusit nga Kosova, një shtetas slloven 49-vjeç, me sa duket nuk e pa me kohë rimorkion.

“Rosenheim24” raporton se autobusi, i mbushur me udhëtarë nga Kosova, u përplas me pjesën e pasme të rimorkios pavarësisht manovrave të shmangies. Pjesa e përparme e autobusit ngeci në kamion dhe u dëmtua rëndë. Rimorkioja u dëmtua gjithashtu rëndë.

Ndërkaq “radio-charivari.de”, duke u thirrur në njoftimin e policisë, thotë se autobusi nga Kosova goditi një rimorkio kamioni të ngarkuar me perime.

“Shoferi 49-vjeçar i autobusit me sa duket e pa rimorkion shumë vonë dhe u përplas në pjesën e pasme të tij. Dy persona të plagosur u shtruan në spital, katër të tjerë u dërguan në klinika për vlerësim”.

“Rosenheim24”, duke u thirrur në njoftimin e policisë, thotë se 30 persona u plagosën në aksident.

Raportohet se shërbimi i shpëtimit ngriti një pikë grumbullimi në stacionin e zjarrfikësve të Irschenberg, dhe një helikopter shpëtimi ishte gjithashtu në përdorim.

Autostrada në drejtim të Munihut mbeti plotësisht e mbyllur për rreth dy orë.

Autobusi dhe kamioni pësuan dëme prej rreth 150,000 eurosh. Një autobus zëvendësues i transportoi pasagjerët e padëmtuar.