Dy policë sulmohen nga të miturit me motoçikleta

Ferizaj është trazuar mbrëmë nga dy raste të rënda të sulmeve ndaj zyrtarëve policorë, ku të mitur që po lëviznin me motoçikleta kanë goditur policët që po përpiqeshin t’i ndalonin.

Rasti i parë – rruga “Brigada 161”

Burimet e Sinjalit bëjnë me dije se më 19 gusht 2025, rreth orës 22:20, në rrugën “Brigada 161”, një zyrtar i Njësisë së Trafikut është përpjekur të ndalojë një motoçikletë me dy të rinj.

Fillimisht ata kanë ndaluar, por më pas drejtuesi i mitur, i identifikuar si Y.Rr., rreth 17-vjeçar, ka shtuar shpejtësinë, duke goditur policin, e ka rrëzuar dhe e ka tërhequr zvarrë disa metra. Polici ka marrë lëndime trupore dhe ka pranuar tretman mjekësor.

Të dy personat që ndodheshin në motoçikletë janë arrestuar, ndërsa prokurori kujdestar ka udhëzuar që rasti të procedohet si “Sulm ndaj personit zyrtar”. Pas intervistimit të të miturit në prani të prindit dhe avokatit, i dyshuari është liruar në procedurë të rregullt.

Rasti i dytë – rruga “Gjon Sereqi”

Vetëm një orë më herët, rreth 21:20, një tjetër rast i ngjashëm ishte shënuar në rrugën “Gjon Sereqi”. Zyrtarët policorë B.A. dhe A.R. i kishin bërë shenjë të ndalonte një të mitur me motoçikletë, E.Q., rreth 16-vjeçar, por ai nuk kishte respektuar urdhrin.

I dyshuari ishte larguar nga vendi i ngjarjes, por i kishte rënë telefoni, përmes të cilit policia arriti ta identifikojë. Pas intervistimit në prani të avokatit dhe prindit, ndaj tij është iniciuar rast për veprën “Sulm ndaj personit zyrtar”, ndërsa për ngasje pa patentë shofer i është shqiptuar edhe një kundërvajtje. Edhe ky i dyshuar është liruar në procedurë të rregullt.

Dy raste brenda një nate

Të dy policët e lënduar kanë marrë tretman mjekësor. Raste të tilla, sipas burimeve të Sinjalit, janë duke u shtuar në Ferizaj, duke ngritur shqetësime serioze për sigurinë e zyrtarëve policorë gjatë detyrës.

Hetimet janë duke vazhduar nga njësitë rajonale nën koordinim me Prokurorinë.