Arrestohen dy persona të dyshuar për fajde

Drejtoria për Hetimin e Krimit të Organizuar dhe Krimeve të Rënda, në bashkëpunim me Prokurorinë Themelore të Prishtinës, ka realizuar sot një operacion policor lidhur me veprën penale të fajdes, ku janë arrestuar dy persona, ndërsa një tjetër është në kërkim.

Sipas njoftimit, personat e dyshuar B.F. (1977), A.F. (1986) dhe B.B. (1985) dyshohen se në vazhdimësi kanë detyruar viktimën të paguajë shuma të ndryshme parash si interes për fajde. Po ashtu, përmes formave të ndryshme të presionit, ata kanë tentuar të marrin nga viktima edhe njësi banesore në ndërtim, të cilat janë pronë e tij.

Gjatë aksionit policor, B.F. është arrestuar në flagrancë duke pranuar para si interes për fajde, ndërsa A.F. është arrestuar në banesën e tij. Ndërkaq, i dyshuari B.B. nuk është gjetur në shtëpi, dhe atij i është lënë ftesë për paraqitje në polici.

Me urdhër të gjykatës, policia ka kontrolluar tri lokacione të të dyshuarve, ku janë sekuestruar dëshmi materiale që do të përdoren në procedurën penale.

Ndaj dy të dyshuarve të arrestuar, Prokuroria Themelore në Prishtinë ka lëshuar aktvendim për ndalim.