Rrahje në Milloshevë pas aksidentit

Një incident i pazakontë është raportuar të enjten në fshatin Milloshevë të Obiliqit, në magjistralen Prishtinë – Mitrovicë, afër autosallonit “Albani”.

Sipas burimeve, rreth orës 12:00 të datës 21 gusht, Policia ka hasur në dy vetura të ndaluara në anë të rrugës, që dukeshin se kishin pësuar përplasje mes vete. Pranë tyre gjendeshin edhe dy persona të përfshirë në rast, të cilët janë shoqëruar menjëherë në stacionin policor në Obiliq.

Në prani të avokatëve, të dy të dyshuarit kanë dhënë deklarata, duke pranuar se pas aksidentit mes tyre, situata ka eskaluar në përleshje fizike.

Të dy personat kanë marrë trajtim mjekësor brenda stacionit policor, ndërsa më pas, me urdhër të Prokurorit të Shtetit, ndaj tyre është iniciuar procedurë penale për veprat:

• “Sulmi” (neni 184)
• “Asgjësimi apo dëmtimi i pasurisë” (neni 321)

Si rezultat, të dy janë dërguar në mbajtje për 48 orë.