Shpërndahen kontratat për hapjen e 79 puseve për ekonomi familjare

Kryetari i Komunës, Shpejtim Bulliqi bashkë me përfaqësuesin e organizatës “Qatar Charity”, kanë marrë pjesë në ceremoninë e shpërndarjes së kontratave për hapjen e 79 puseve për furnizim me ujë të pijes për qytetarë të Komunës së Podujevës, të cilët janë me gjendje më të vështirë ekonomike.

Ky projekt po mundësohet nga memorandumi i bashkëpunimit që ka nënshkruar Komuna e Podujevës me organizatën “Qatar Charity” për hapjen e 62 puseve të reja, por pak ditë më parë kryetari Bulliqi dhe përfaqësuesi i organizatës në fjalë, kanë nënshkruar aneks marrëveshjen për hapjen edhe të 17 puseve të tjera.

Kryetari Bulliqi tha se “Projekti mbulohet 90% nga organizata “Qatar Charity”, ndërsa me 10% të vlerës totale participon Komuna e Podujevës. Organizata merr përsipër hapjen e puseve dhe montimin e pompave të ujit me të gjitha pajisjet përcjellëse”.

Kryetari Bulliqi për fund tha “Në emër të Komunës së Podujevës u jam shumë falënderues organizatës për bashkëpunimin e deritanishëm, si dhe zotohem për bashkëpunim të mëtujteshëm me organizatën nga Katari edhe në projekte të tjera”.