Dyshim për keqpërdorim mbi 150 mijë € te “Stupcat”, Osman Azemi denoncon rastin te organet e rendit

“Rikthimi i Stupcave” ka bërë bujë të madhe ditëve të fundit. E gjithë kjo nisi nga deklarata e Vedat Bajramit, i cili kishte thënë që “Stupcat” do të rikthehen me Vedatin dhe Mensurin. Këto fjalë i pohoi edhe Mensur Safqiu i cili për Indeksonline tha që Vedati ka folur në emër të tij.

Indeksonline ka kontaktuar edhe me Osman Azemin, i cili nuk foli shumë shkaku i respektit që ka ndaj kolegëve.

“Për shkak te korrektësisë dhe respektit qe kam për koleget e mi qe kemi punuar bashkë dy dekada kisha pas dëshirë që të kontaktoni zyrën ligjore gjegjësisht avokatin dhe të më kurseni mua”, tha ai.

Avokati Kushtrim Palushi, i cili përfaqëson Osman Azemin për Indeksonline tha se ka dyshime serioze për keqpërdorime financiare të mëdha në kompaninë “Stupcat Group”. Lidhur me këtë, avokati nesër do t’i drejtohet organeve kompetente, Prokurorisë së Shtetit dhe ATK-së, për të hetuar dhe zbuluar veprat e mundshme penale që janë kryer.