Alkooli po shkatërron familjet: 58-vjeçari sulmon gruan me thikë, djalit i pren gishtat

Një rast i rëndë dhune në familje, i shkaktuar nga konsumimi i alkoolit, ka tronditur mbrëmjen e së dielës fshatin Istog i Poshtëm.

Rreth orës 20:25, djali 24-vjeçar i familjes ka njoftuar Policinë e Kosovës se babai i tij, 58 vjeç, ishte duke ndjekur me thikë bashkëshorten e tij 55-vjeçare. Gjatë përpjekjes për ta mbrojtur nënën, ai ka pësuar lëndime serioze në gishtat e dorës, ndërsa edhe e ëma është plagosur, raporton PodujevaSot.net.

Policia ka ndërhyrë menjëherë në vendngjarje, ka sekuestruar thikën dhe ka shoqëruar të dyshuarin në stacion. Në të njëjtën kohë, viktimat janë dërguar për trajtim mjekësor në emergjencë.

Testi i alkoolit ka treguar se 58-vjeçari kishte 1.10 promila alkool në gjak. Me urdhër të Prokurorit, ndaj tij është hapur rasti “Dhunë në familje” dhe i është shqiptuar masa e ndalimit për 48 orë, raporton PodujevaSot.net.

Policia ka bërë thirrje për parandalimin e dhunës në familje dhe ndërgjegjësim kundër konsumimit të tepruar të alkoolit, duke e cilësuar si një nga shkaqet kryesore të tragjedive familjare.