Kandidat i VV-së për asamble rrezikon një muaj paraburgim

Gazeta Sinjali raportoi për një aksion të gjerë të Policisë së Kosovës në fshatin Zhegovc të Gjilanit, ku u zbuluan katër plantacione të kanabisit dhe u arrestuan tre persona të dyshuar për kultivimin e rreth 500 bimëve narkotike.

Në mesin e të arrestuarve është edhe Rinas Zeqiri, rreth 25-vjeçar, kandidat i Lëvizjes Vetëvendosje për Asamblenë Komunale në Novobërdë. Bashkë me të janë arrestuar edhe Ardit Sylejmani, rreth 34-vjeçar, dhe Rinor Ahmeti, rreth 27-vjeçar.

Të tre të dyshuarit dyshohet se ishin përfshirë në kultivimin e rreth 500 bimëve kanabis sativa, disa prej të cilave thuhet se kishin arritur deri në 2 metra lartësi dhe ishin në fazë të avancuar për përpunim.

Gjatë bastisjes janë gjetur dhe sekuestruar: një armë e gjatë AK-47, një karikator me 19 fishekë kalibër 7.62×39 mm, pesë telefona, si dhe një veturë Golf V.

Lidhur me rastin, Prokurori i Shtetit ka urdhëruar masën e ndalimit ndaj tyre, ndërsa tashmë është ushtruar edhe kërkesa për masën e sigurisë.

Kjo është konfirmuar nga Prokuroria Themelore e Gjilanit, e cila ka bërë me dije se ndaj Zeqirit dhe dy të tjerëve është kërkuar paraburgimi për 1 muaj.

“Referuar kërkesës tuaj të parashtruar më 25 gusht 2025, lidhur me aksionin antidrogë në fshatin Zhegoc të Gjilanit, ju njoftojmë se Prokuroria Themelore në Gjilan, Departamenti për Krime të Rënda, me urdhër të prokurorit kujdestar, ka ndaluar tre persona me inicialet A.S., R.A. dhe R.Z., nën dyshimin se kanë kryer veprën penale ‘Kultivimi i bimës së hashashit, shkurres së kokainës ose bimëve të kanabisit’ nga neni 272 i Kodit Penal të Republikës së Kosovës, si dhe veprën penale ‘Mbajtja në pronësi, kontroll ose posedim të paautorizuar të armëve’ nga neni 366 i të njëjtit Kod. Ndaj të dyshuarve, Prokurori i Shtetit ka dorëzuar kërkesë për caktimin e masës së paraburgimit në Gjykatën Themelore në Gjilan, Departamenti për Krime të Rënda.”, thuhet në përgjigjen e Prokurorisë.