Lajmi i fundit: Një person gjendet pa shenja jete në shtëpinë e tij

Një ngjarje e rëndë është shënuar në fshatin Qeskov të Klinës, ku një burrë që jetonte i vetëm është gjetur i vdekur në shtëpinë e tij.

Viktima prej rreth 10 ditësh nuk kishte pasur asnjë kontakt me familjarët. Kjo ka bërë që një e afërme e tij, të njoftonte Policinë më 25 gusht 2025, rreth orës 15:30.

Njësitë policore dhe ekipi mjekësor i QMF Klinë kanë dalë menjëherë në vendin e ngjarjes, ku mjeku kujdestar ka konstatuar vdekjen, por e ka cilësuar atë si të dyshimtë.

Në lokacion kanë shkuar edhe njësia e hetimeve dhe më pas Hetimet Rajonale, ndërsa me urdhër të Prokurorit të Shtetit, trupi i pajetë është dërguar për obduksion në Institutin e Mjekësisë Ligjore.

Rasti është cilësuar si “Hetim i vdekjes”, ndërsa hetimet janë duke vazhduar për të zbardhur shkaqet dhe rrethanat e ngjarjes.