Kelmendi: Sot një nga momentet më të tmerrshme për Kosovën

Gazetari dhe autori i emisionit “Rubikon” në Klan Kosova, Adriatik Kelmendi, ka reaguar në lidhje me zgjedhjen e Dimal Bashës si kryetar të Kuvendit të Kosovës, duke e quajtur këtë zhvillim kulmin e një periudhe të errët për vendin.

Përmes një postimi në Facebook, Kelmendi shkruan se kjo është pasojë e udhëheqjes së Albin Kurtit, i cili sipas tij, nuk është i preokupuar me popullin shqiptar, shtetin apo partinë, por vetëm me interesin personal, transmeton Klankosova.tv.

“Kjo e keqe që i ka ndodhur këto muaj Kosovës, kulmimi i së cilës ishte sot, po, mund të shërbejë si një rrëfim i këndshëm i pasdarkave diplomatike me një gotë vere në dorë, ku kryepersonazhi AK tregon se si ka tallur bash të gjithë”,  ka shkruar ai.

Ai e konsideron këtë moment si një nga më të dhimbshmit në historinë e një populli që ka luftuar për liri dhe vetëvendosje, duke shtuar se zhvlerësimi që i bëhet shtetit nuk mund të falet, sidomos nga ata që pretendojnë ta përfaqësojnë atë.

“Gjithçka e ka kontekstin e vet historik. Mjerë ata që do të mbesin në histori për atë që po i ndodhë Kosovës këto ditë”, ka shkruar Kelmendi.