Pse Haga po fsheh emrat e 4 nga 11 personat që nuk lejohet të vizitojnë Thaçin?

Dhomat e Specializuara të Kosovës kanë vendosur më 18 gusht 2025 që 11 personave t’ua ndalojnë vizitat te ish-presidenti Hashim Thaçi në Qendrën e Paraburgimit në Hagë. Nga kjo listë, katër emra mbeten të redaktuar dhe nuk janë bërë publikë, duke nxitur pyetje për arsyet e fshehjes së tyre.

Prokuroria kishte kërkuar që emrat të zbuloheshin, por gjyqtarja e procedurës paraprake, Marjorie Masselot, e refuzoi këtë kërkesë. Sipas saj, publikimi i emrave do të rrezikonte mbrojtjen e dëshmitarëve dhe do të minonte procesin e redaktimit të aplikuar më herët, raporton PodujevaSot.net.

Në listën e bërë publike figurojnë emra si Artan Behrami, Blerim Shala, Ismail Syla, Vllaznim Kryeziu, Milaim Ahmetaj, Milaim Cakiqi dhe Avni Kastrati. Prokuroria pretendon se këta persona, gjatë vizitave të mëparshme, kanë marrë udhëzime nga Thaçi për t’i përcjellë tek dëshmitarët, duke argumentuar se kjo përbën ndërhyrje në drejtësi.

Hashim Thaçi po qëndron në Hagë që nga nëntori i vitit 2020 dhe po përballet me akuza për krime lufte, krime kundër njerëzimit dhe pengim të drejtësisë, raporton PodujevaSot.net.