Përleshja mes punëtorëve – Njëri në gjendje të rëndë

Një ngjarje e rëndë është shënuar sot në mëngjes në Vushtrri, ku një konflikt mes punëtorëve të dy kompanive private ka përfunduar me therje me thikë.

Ngjarja ka ndodhur në rrugën “Hamdi Gashi”, në hapësirën e banesave të bardha që po rinovohen nga kompani të kontraktuara nga Komuna e Vushtrrisë.

Gjatë punimeve, punëtorët u përfshinë në një konflikt fizik, ku u përdorën mjete të forta dhe një thikë. Si pasojë, tre persona kanë mbetur të lënduar. Njëri prej të përfshirëve ka pësuar lëndime të rënda dhe është transferuar nga Spitali i Mitrovicës në QKUK-Prishtinë, ku gjendja e tij sipas mjekëve është kritike.

Policia, hetuesit dhe forenzika kanë dalë në vendin e ngjarjes, ku kanë konstatuar gjurmë gjaku dhe kanë sekuestruar thikën e përdorur.

Pas intervistimit të të dyshuarve dhe dëshmitarëve, me urdhër të Prokurorit të Shtetit një person është ndaluar për 48 orë, ndërsa dy të tjerë janë liruar dhe rasti do të procedohet në mënyrë të rregullt.