Rrahje brutale në një diskotekë në Prishtinë

Një përleshje e dhunshme ka ndodhur në orët e para të mëngjesit të sotëm në kryeqytet. Sinjali mëson se rasti është raportuar rreth orës 03:30 në rrugën Epiri, përballë diskotekës “Gate”, ku një person ka pësuar lëndime të rënda trupore.

Njësitë e Policisë së Stacionit Jugu me të arritur në vendngjarje kanë gjetur të lënduarin, i cili u identifikua si E. P. rreth 37-vjeçar. Viktimës iu është ofruar menjëherë ndihma e shpejtë në vend dhe më pas është transportuar në QKUK për trajtim mjekësor, ku edhe është intervistuar në cilësinë e të dëmtuarit.

Në stacion janë shoqëruar gjithashtu edhe katër dëshmitarë: E. V., A.I, A.Ll. dhe B. G, të cilët kanë dhënë deklarata lidhur me rastin.

Sipas dëshmive, rreth pesë persona e kishin sulmuar fizikisht viktimën, duke e goditur brutalisht dhe më pas u larguan nga vendi i ngjarjes.

Pas një aksioni të shpejtë, policia ka arritur të arrestojë katër të dyshuar.

Të dyshuarit janë shoqëruar në stacion dhe janë intervistuar në prani të avokatëve mbrojtës të caktuar sipas detyrës zyrtare.

Me urdhër të Prokurorit të Shtetit është iniciuar rasti “Lëndim i rëndë trupor”, ndërsa katër të dyshuarit janë ndaluar për 48 orë.