Lajmi i fundit: Një person hyn nga Serbia në Kosovë ilegalisht, arrestohet nga Policia, i sekuestrohen mijëra euro

Një rast i kontrabandës dhe hyrjes së paautorizuar në territorin e Republikës së Kosovës është regjistruar të shtunën rreth orës 16:30 në fshatin Joshanicë, komuna e Leposaviqit.

Sipas informatave të Policisë së Kosovës, është ndaluar një automjet i llojit VW Sharan, ngjyrë e kuqe, me targa serbe (NP), i drejtuar nga një person me inicialet M.B. (i lindur në vitin 1980), i cili dyshohet se ka hyrë ilegalisht nga territori i Serbisë në Kosovë, duke shmangur vendkalimet kufitare zyrtare.

Gjatë kontrollit të automjetit dhe të dyshuarit, policia ka gjetur dhe sekuestruar 13,992 euro në para të gatshme, 17,880 dinarë serbë, materiale për mobilje me vlerë prej 600 euro

Me urdhër të Prokurorit të Shtetit, është iniciuar rasti penal me emërtimin “Kalim i paautorizuar i vendkalimit kufitar apo vijës kufitare”. Automjeti, mjetet financiare dhe mallrat e kontrabanduara janë dërguar në Terminalin Doganor në Mitrovicë, për procedura të mëtejme ligjore nga njësitë përkatëse të Policisë dhe Doganës së Kosovës.

Hetimet janë në zhvillim e sipër.