Shqiptari i dehur sulmon 2 infermiere në urgjencën spitalore të Italisë

Një ngjarje e rëndë ka tronditur Italinë veriperëndimore, pasi një 41-vjeçar shqiptar sulmoi dy infermierë dhe vandalizoi ambientet e urgjencës së spitalit në qytetin Imperia, në rajonin e Ligurisë.

Sulmi ndodhi mbrëmjen e 30 gushtit, rreth orës 20:00, kur agresori, i dehur dhe i sapo liruar nga arresti shtëpiak, hyri në zonën e triages dhe u bë i dhunshëm ndaj stafit mjekësor.

Dy infermierët mbetën të plagosur, duke pësuar lëndime që kërkojnë trajtime mjekësore me prognosi prej 16 dhe 6 ditësh, ndërsa dhuna e tij shkaktoi dëme të konsiderueshme materiale në repartin e urgjencës, raporton PodujevaSot.net.

Për ta neutralizuar situatën e rrezikshme, u desh ndërhyrja e menjëhershme e forcave të karabinierëve, policisë dhe Guardia di Finanza. Ngjarja krijoi frikë edhe tek pacientët që ndodheshin aty në momentin e sulmit, raporton PodujevaSot.net.

Nënkryetari i Rajonit të Ligurisë, Alessandro Piana, reagoi ashpër duke e cilësuar incidentin të papranueshëm. Ai kërkoi masa më të forta për mbrojtjen e stafit shëndetësor dhe zbatimin rigoroz të urdhrave të dëbimit për personat që nuk kanë të drejtë qëndrimi në Itali.

Drejtoria e Shëndetit ASL 1 në Liguri shprehu solidaritet me infermierët e sulmuar dhe pacientët e pranishëm, duke theksuar se urgjencat duhet të mbeten vende të sigurta për të gjithë.