Shpërthejnë polemikat në Angli, zëvendësohet gjyqtari i ndeshjes Liverpool-Arsenal në çastet e fundit

Vetëm disa orë para ndeshjes së shumëpritur mes Liverpool dhe Arsenal, ka ndodhur një ndërrim i papritur në ekipin e gjyqtarëve  të ndeshjes.

Liverpool pret Arsenalin të dielën, në atë që konsiderohet si ndeshja kryesore e fundjavës Ligën Premier.

Të dyja skuadrat kanë fituar dy ndeshjet e para të sezonit dhe takimi në ‘Anfield’ pritet të jetë një duel me intensitet të lartë.

Por në një zhvillim të papritur, Michael Salisbury është zëvendësuar nga detyra e VAR-it, vetëm pak orë para fillimit të ndeshjes, për shkak të një polemike që shpërtheu të shtunën në ndeshjen mes Chelsea dhe Fulham.

John Brooks do të jetë tani në detyrën e VAR për përballjen Liverpool – Arsenal.

Sipas raportimeve nga gazetari Ben Jacobs, Bordi Profesional i Zyrtarëve të Ndeshjeve (PGMOL) ka pranuar se Salisbury gaboi në vendimin për të anuluar një gol të Fulham ndaj Chelseat në ‘Stamford Bridge’.

Vendimi i Salisburyt nuk ishte në përputhje me standardin e lartë të ndërhyrjes nga VAR-i që kërkon PGMOL.

Incidenti ndodhi kur Josh King shënoi për Fulhamin, por goli u anulua pas ndërhyrjes së Salisburyt, që kërkoi që gjyqtari në fushë Rob Jones të rishikonte aksionin në monitor.

U vendos që Rodrigo Muniz kishte faulluar Trevoh Chalobah në aksionin që çoi në gol, ndonëse lojtari i Fulham ishte në zotërim të topit dhe kontakti ishte i paqëllimshëm.

Michael Salisbury ishte caktuar të mbante detyrën e VAR në supersfidën Liverpool – Arsenal, por është hequr nga pozicioni pas gabimit të tij në Stamford Bridge./Telegrafi