Mbrojtja e Thaçit e gatshme për gjykim nga kjo datë

Mbrojtja e ish-presidentit Hashim Thaçi ka njoftuar se është e gatshme për fillimin e gjykimit në rastin për administrim të drejtësisë më 2 mars 2026. Ata theksojnë se procesi duhet të nisë vetëm pasi të përfundojnë argumentet përmbyllëse në rastin për krime lufte.

Në parashtresat e dorëzuara, avokatja Sophie Menegon tha se mbrojtja përballet me kufizime serioze në hetime për shkak të mbivendosjes së dëshmitarëve me çështjen kryesore për krime lufte, raporton PodujevaSot.net. Sipas saj, dy procedurat paralele ndaj Thaçit e pengojnë atë të përgatitet në mënyrë të plotë.

Mbrojtja pretendon se aktakuza ka mangësi, duke shtuar se nuk ka përmbledhje të qartë për provat mbi të cilat Prokuroria bazohet. Ata e konsiderojnë këtë si pengesë në të drejtën për mbrojtje të drejtë.

Po ashtu, avokatët njoftuan se bashkë-avokati i Thaçit do të ketë angazhime të tjera gjatë shkurtit dhe prillit 2026, çka vështirëson koordinimin, raporton PodujevaSot.net.

Thaçi gjendet në paraburgim në Hagë që nga nëntori 2020. Përveç akuzave për krime lufte, ai dhe disa bashkëpunëtorë akuzohen edhe për pengim të drejtësisë dhe mosbindje ndaj gjykatës.