Peci: Nuk jam hiç pishman që kam dalë nga LDK-ja

Faton Peci, ministër në detyrë i Bujqësisë, Pylltarisë dhe Zhvillimit Rural, ka thënë se nuk është penduar që është larguar nga Lidhja Demokratike e Kosovës, për të themeluar më pas partinë Lista Guxo, të cilën e drejton në bashkëpunim me Donika Gërvallën.

Në emisionin “DPT te Fidani” në Klan Kosova, ai ka theksuar se, nëse do të kishte mbetur në LDK, nuk do të kishte hapësirë më shumë sesa në koalicionin qeverisës me Lëvizjen Vetëvendosje, nga zgjedhjet nacionale të 14 shkurtit të vitit 2021.

“Dihet botërisht që kemi dalë nga Lidhja Demokratike e Kosovës dhe nuk jam hiç pishman. E kemi themeluar shtëpinë tonë politike, për të cilën vazhdojmë të japim kontribut për Kosovën – dhe kjo nuk na pengon, përkundrazi: kemi krijuar hapësirë më të madhe për të dhënë kontribut për vendin.”

“Sepse ndryshe, unë jam shumë skeptik se do ta kisha hapësirën për të qenë ministër dhe për të dhënë kontributin që kam dhënë për katër vite e gjysmë në sektorin ku jam – ashtu siç ka dhënë edhe Donika Gërvalla dhe shumë të tjerë,” u shpreh Peci.

Këto deklarata, Peci i bëri pasi u pyet lidhur me polemikat që u shkaktuan nga LDK-ja për kandidimin e Donika Gërvallës për kryetare të Kuvendit.

Ai shtoi gjithashtu se kishte pritur që dikush nga figurat e LDK-së ta votonte Gërvallën. /Klankosova.tv