Ramiz Lladrovci: “Shpifjet, fyerjet dhe dezinformatat nuk kanë vend në Drenas”

Kryetari i Komunës së Drenasit, Ramiz Lladrovci, ka reaguar përmes një postimi publik lidhur me shpifjet dhe fyerjet që, sipas tij, po bëhen ndaj tij dhe angazhimit të tij politik.

Lladrovci ka rikujtuar se edhe në zgjedhjet e kaluara lokale, në vitin 2021, organet e rendit dhe të drejtësisë kishin zbuluar dhe ndëshkuar 18 profile të rreme në rrjete sociale, të cilat kishin shpërndarë shpifje dhe dezinformata.

Ai theksoi se të njëjtët autorë, së bashku me disa persona të afërt me kundërshtarët politikë, po përdorin sërish profile të tjera për të shpërndarë lajme të rreme, komente fyese dhe montazhe ndaj tij në prag të zgjedhjeve të 12 tetorit.

“Deri më tash, disa dezinformata të këtij ‘ekipi’ janë demantuar nga z. Xhavit Haliti dhe z. Lirim Mehmetaj, të cilët i falënderoj për sqarimet shtesë. Formula e zgjedhjeve të kaluara ‘shpif, shpif se diçka mbetet’, nuk do t’ju ecë,” ka shkruar Lladrovci.

Ai u ka dërguar një mesazh të qartë atyre që i quan shpifës me profile të rreme:

“Shpifjet, fyerjet dhe dezinformatat nuk kanë vend në Drenas. Sërish do të përballeni me drejtësinë. Nuk mund ta ndalni fitoren tonë ‘Për Drenasin Kampion me Ramiz Lladrovcin’.”