Për çdo mashtrim me çmimet e librave, këtu mund ta paraqitni rastin

Ministria e Industrisë, Ndërmarrësisë dhe Tregtisë ka njoftuar se përmes Inspektoratit Qendror të Mbikëqyrjes së Tregut ka filluar nga 1 shtatori një fushatë të shtuar inspektimesh në gjithë Kosovën.

Qëllimi i tyre është garantimi i mbrojtjes së të drejtave të autorit dhe monitorimi i çmimeve të teksteve shkollore, raporton PodujevaSot.net.

Vetëm ditët e para janë inspektuar mbi 30 operatorë ekonomikë. Në rastet ku janë konstatuar shkelje ligjore, janë marrë masa ndëshkuese në përputhje me legjislacionin në fuqi.

Inspektorati do të vazhdojë me kontrolle edhe në ditët në vijim. Fokus i veçantë do t’i kushtohet shtëpive botuese dhe shpërndarësve, për të siguruar se librat janë në përputhje me të drejtat e autorit, raporton PodujevaSot.net.

Po ashtu, do të monitorohen rreptësisht çmimet e teksteve për të garantuar që ato të jenë të arsyeshme dhe të mbrohen konsumatorët.

Autoritetet u bëjnë thirrje të gjithë akterëve që të bashkëpunojnë për një treg të drejtë e transparent, duke respektuar autorët dhe duke ofruar çmime të pranueshme për prindërit dhe nxënësit.

Qytetarët që ndeshen me mashtrime mund t’i paraqesin rastet përmes:

Numrit pa pagesë 0800 11000

Email: konsumatori@rks-gov.net