“Hajni bërtet kapeni hajnin” – Haradinaj i ashpër ndaj Kurtit

Kryetari i Aleancës për Ardhmërinë e Kosovës (AAK), Ramush Haradinaj, ka reaguar ashpër ndaj deklaratave të kryeministrit në detyrë, Albin Kurti, drejtuar Gjykatës Kushtetuese.

Përmes një njoftimi në Facebook, Haradinaj ka thënë se është e dhimbshme kur një kryeministër në detyrë, që synon ta marrë sërish pushtetin, nuk e njeh institucionin më të lartë të drejtësisë dhe e sulmon egërsisht atë.

“E dhimbshme kur kryeministri i deritashëm dhe ai që pretendon të jetë prapë kryeministër, nuk e njeh institucionin më të lartë të drejtësisë në vendin e vet dhe e sulmon aq egër e aq ulët. Ai nuk flet për shkeljet e njëpasnjëshme të Kushtetutës që i ka bërë ai e partia e tij, por zgjedh të mashtrojë sikur fajin e paskan gjyqtarët e Kushtetueses.

Kjo ma kujton atë shprehjen popullore kur ‘hajni bërtet kapeni hajnin’!”, ka shkruar Haradinaj.

Ai ka theksuar se gjyqtarët e Gjykatës Kushtetuese janë zgjedhur nga Kuvendi legjitim i Republikës së Kosovës, e jo nga siç u shpreh ai, “formacionet imagjinare” të Kurtit.

Në vijim të reagimit, Haradinaj akuzon drejtpërdrejt Kurtin për gjendjen aktuale politike në vend.

“E vërteta për bllokimin, jo vetëm të Parlamentit por edhe të Shtetit, e ka vetëm një emër e ky është Albin Kurti dhe kjo sot është e qartë për secilin, veç në mendjen e Albin Kurtit është e mjegullt!” – shkruan Haradinaj.

Ai bën thirrje që Gjykata Kushtetuese, përveç konstatimeve të shkeljeve të Kushtetutës, të saktësojë edhe pasojat juridike për individët apo grupet që i shkaktojnë ato.

“Institucioni më i lartë i drejtësisë në vend, e ka kohën e fundit që në intepretimet e tij për shkelje të Kushtetutës, të mos mjaftohet vetëm me konstatimin e tyre, por t’i saktësojë edhe pasojat ligjore juridike, për secilin individ apo grup që i bën ato! Vetëm drejtësia e plotë është drejtësi!”, përfundon ai.