Procesi në Hagë drejt fundit? Avokati i njohur bën paralajmërimin e madh për ish-krerët e UÇK-së

Avokati Skender Musa ka folur për procesin gjyqësor në Hagë, ku po gjykohen ish-krerët e UÇK-së. Ai ka thënë se pret që procesi të përfundojë në muajin nëntor ose pak më vonë dhe se dëshmitarët e mbrojtjes së ish-presidentit Hashim Thaçi janë njerëz eminent dhe me besueshmëri të lartë.

Sipas tij, dëshmitë e ish-zyrtarëve të lartë të NATO-s, SHBA-ve dhe BE-së kanë peshë shumë më të madhe sesa dëshmitë e personave të tjerë që njihen në Kosovë. Ai theksoi se gjykata duhet t’i marrë parasysh dëshmitarët më objektiv, e jo ata që mund të jenë të paguar apo të nxitur, raporton PodujevaSot.

Musa tha se beson fuqishëm në pafajësinë e ish-krerëve të UÇK-së dhe se nëse ata dënohen pa prova, kjo do të ishte një tmerr për drejtësinë e Kosovës dhe atë ndërkombëtare. Ai shtoi se deri më tani nuk është paraqitur asnjë provë bindëse që i lidh me krime lufte apo shkelje të të drejtave ndërkombëtare.

Ai theksoi se mbrojtja ka qenë shumë efektive dhe pret që përmes dëgjimit të dëshmitarëve të mbrojtjes të hidhen poshtë pretendimet e prokurorisë speciale dhe të sigurohet një proces i drejtë gjyqësor, raporton PodujevaSot.