Gjykimi ndaj ish-krerëve të UÇK-së ndryshon drejtim nga 15 shtatori

Në Dhomat e Specializuara të Kosovës në Hagë, deri më tani janë pranuar dëshmitë e 264 dëshmitarëve në procesin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit.

Nga ky numër, 262 dëshmitarë janë të Prokurorisë, ndërsa dy të mbrojtjes së viktimave, raporton PodujevaSot.net.

Prej tyre, 125 dëshmitarë të Prokurorisë dhe dy të mbrojtjes së viktimave kanë dëshmuar drejtpërdrejt në sallën e gjyqit, ndërsa 137 dëshmi të tjera janë pranuar me shkrim sipas rregullave 153 dhe 155 të procedurës. Një pjesë e madhe e dëshmitarëve kanë dëshmuar me masa mbrojtëse, raporton PodujevaSot.net.

Prokuroria e ka përfunduar paraqitjen e provave më 15 prill 2025. Tani, nga 15 shtatori 2025, është planifikuar të nisë dëgjimi i dëshmitarëve të mbrojtjes, çka pritet të shënojë një kthesë në këtë proces gjyqësor.

Aktakuza ndaj Thaçit, Veselit, Selimit dhe Krasniqit, e konfirmuar më 26 tetor 2020, përmban dhjetë pika që lidhen me krime lufte dhe krime kundër njerëzimit. Të gjithë të akuzuarit janë deklaruar të pafajshëm në paraqitjet e tyre të para.