LAJMI I FUNDIT: Ky është kosovari i arrestuar nga Policia e Serbisë

Ministria e Punëve të Jashtme dhe Diasporës (MPJD) ka reaguar pas arrestimit të qytetarit të Kosovës, Hazir (Arif) Haziri, nga autoritetet e Serbisë, raporton Gazeta Sinjali.

Në njoftimin zyrtar theksohet se Haziri u ndalua më 8 shtator 2025 në pikën kufitare të Merdarës, gjatë hyrjes në territorin serb me automjet privat.

Sipas MPJD-së, menjëherë pas marrjes së informacionit, Zyra Ndërlidhëse e Kosovës në Serbi është angazhuar përmes kanaleve diplomatike për të siguruar të dhëna të sakta dhe të plota mbi ndalimin e tij.

“Zyra Ndërlidhëse e Republikës së Kosovës ka adresuar një kërkesë zyrtare autoriteteve të Qeverisë së Serbisë për të konfirmuar arrestimin e z. Haziri dhe për të sqaruar arsyet ligjore të ndalimit të tij.”, thuhet në reagim.

Për këtë rast është njoftuar edhe Delegacioni i BE-së në Serbi, si dhe përfaqësuesit diplomatikë të vendeve të Quint-it. Nëse ndaj Hazirit vendoset masa e paraburgimit dhe iniciohet procedurë penale, Zyra Ndërlidhëse e Kosovës do të paraqesë kërkesë për vizitë zyrtare në qendrën e ndalimit.

MPJD u ka bërë thirrje qytetarëve të Kosovës që të shmangin kalimin nëpër Serbi, për të garantuar sigurinë dhe mirëqenien e tyre.

“MPJD gjithashtu nënvizon nevojën urgjente për reagim nga ana e Bashkësisë Ndërkombëtare ndaj praktikave represive të autoriteteve serbe, të cilat bien ndesh me parimet themelore të së drejtës ndërkombëtare dhe me konventat ndërkombëtare për të drejtat e njeriut”, thuhet më tej.

Në reagim theksohet se rritja e rasteve të ndalimeve dhe maltretimeve të qytetarëve të Kosovës nga autoritetet serbe përbën shkelje të frymës së dialogut dhe marrëveshjeve të nënshkruara mes dy palëve.