Video e frikshme, aksidenti tragjik ku vdiq një 18 vjeçar
Një aksident i rëndë është regjistruar në orët e para të mëngjesit të sotëm, të premten më 12 shtator, në periferi të qytetit të Bolonjës, në Itali. Ngjarja ka ndodhur në kryqëzimin midis Via Murridhe Via dei Lamponi, ku një makinë në ndjekje nga policia ka përfunduar e përplasur me shpejtësi të lartë, duke shkaktuar vdekjen e një të riu shqiptar, Valjero Maksuti, vetëm 18 vjeç.
Sipas autoriteteve italiane, gjithçka nisi në Via Tolmino, ku një patrullë policie dalloi një automjet tip Audi, të ndaluar në një semafor, i cili rezultoi i vjedhur. Në momentin që semafori u bë jeshil, drejtuesi i mjetit, një tjetër i ri shqiptar, 19 vjeç, nuk iu bind sinjalit të ndalimit dhe u largua me shpejtësi të madhe, duke nisur kështu një ndjekje të rrezikshme.
Arratisja përfundoi tragjikisht vetëm pak minuta më vonë, kur drejtuesi humbi kontrollin mbi makinën për shkak të shpejtësisë së lartë. Automjeti u përplas fillimisht me një shtyllë ndriçimi dhe më pas me disa makina të parkuara, duke u copëtuar pothuajse në mes. Përplasja rezultoi fatale për pasagjerin 18-vjeçar, i cili humbi jetën në vend. Ndërsa shoferi mbeti i plagosur dhe u dërgua në spital në gjendje të stabilizuar.
Një dëshmitar okular, shitës në një kioskë pranë vendit të aksidentit, ka përshkruar për BolognaToday momentet dramatike:
“Një zhurmë e fuqishme, pa asnjë frenim. E pashë makinën duke ardhur me shpejtësi të tmerrshme… më pas vetëm kaos, klithma dhe sirena.”
Sipas burimeve policore, 18-vjeçari shqiptar kishte precedentë penalë për vjedhje dhe rezistencë ndaj arrestimit. Ndërkohë, 19-vjeçari që drejtonte automjetin nuk rezulton të ketë pasur të kaluar kriminale.
Ngjarja ka tronditur komunitetin lokal në Bolonjë, ndërsa hetimet vazhdojnë për të sqaruar plotësisht rrethanat e incidentit, si dhe origjinën e automjetit të vjedhur.
VIDEO:
Pas lajmit të aksidentit tragjik në Bolonjë, ku një 18-vjeçar shqiptar humbi jetën dhe një tjetër mbeti i plagosur, tashmë në rrjetet sociale dhe mediat italiane po qarkullon edhe videoja e momentit të përplasjes.
Pamjet e siguruara nga kamerat e sigurisë tregojnë momentin kur makina tip Audi, e cila rezultonte e vjedhur, humb kontrollin në një kryqëzim me shpejtësi të lartë dhe përplaset fuqishëm fillimisht me një shtyllë ndriçimi, e më pas me disa automjete të parkuara. Goditja ka qenë aq e fortë, sa mjeti është dëmtuar pothuajse i gjithi, duke e bërë të pamundur shpëtimin e pasagjerit 18-vjeçar, i cili humbi jetën në vend.
Videoja, që tashmë po shpërndahet gjerësisht, ka tronditur opinionin publik në Itali dhe jo vetëm, duke sjellë reagime të forta për sjelljet e rrezikshme në trafik, sidomos gjatë tentativave për t’iu shmangur policisë.
Autoritetet italiane kanë konfirmuar se hetimet vijojnë për të sqaruar të gjitha rrethanat e ngjarjes, si dhe origjinën e automjetit të vjedhur, ndërkohë që publikimi i videos i ka dhënë edhe më shumë jehonë tragjedisë që ndodhi në orët e para të mëngjesit të sotëm.
Posted by JOQ Albania on Friday, September 12, 2025
