Zyrtare: Serbi – Shqipëri nuk luhet në Beograd, ja ku pritet të luhet sfida më e rëndësishme e kuqezinjëve

Tashmë është zyrtarizuar, ndeshja Serbi–Shqipëri nuk do të luhet më në “Marakanën” e Beogradit, stadiumin legjendar të Crvena Zvezdës “Rajko Mitić”. Pas kërkesës së Federatës Serbe të Futbollit, UEFA dhe Federata Shqiptare e Futbollit kanë miratuar që sfida të zhvendoset në stadiumin “Doçica” të Leskovacit.

Ky impiant modern u rikonstruktua në vitin 2023 dhe ka një kapacitet prej vetëm 8 mijë vendesh, ndryshe nga “Rajko Mitić” që mban rreth 52 mijë tifozë. Vendimi shënon një ulje të madhe të kapacitetit, por sipas burimeve, synon të shmangë incidentet e mundshme dhe të krijojë kushte më të lehta sigurie.

Pas ngjarjeve të fundit në ndeshjen Serbi–Angli, ku pati tensione dhe sjellje të dhunshme nga tifozët vendas, pritet që UEFA të japë një dënim të rëndë, ndeshja me Shqipërinë pritet të luhet pa tifozë, shoqëruar me gjobë të majme ndaj Federatës Serbe.

Nga frika e përsëritjes së skenave të shkuara dhe pamundësisë për të kontrolluar huliganët e saj, organizatorët kanë zgjedhur të “largohen” nga Beogradi dhe të zhvendosin përballjen në një stadium më të vogël, por më të menaxhueshëm.

Kjo përballje mbetet vendimtare për Kombëtaren tonë: kuqezinjtë duhet të japin maksimumin jo vetëm për krenarinë kombëtare, por edhe për tre pikët që i mbajnë në vendin e dytë dhe i çojnë drejt play-off-it, aty ku vazhdon ëndrra e madhe e Botërorit.