Ish-ambasadori holandez me deklaratë të fuqishme për rastin e Thaçit

Ish-ambasadori i Holandës në Kosovë, Robert Bosch, gjatë një fjalimi para protestuesve në Hagë, ka kujtuar një bisedë me ish-kryeministrin e Kosovës, Hashim Thaçi, i cili aktualisht mbahet në paraburgimin e Speciales nën akuzë për krime lufte dhe krime kundër njerëzimit.

“Më kujtohet kur shkova dhe e takova Thaçin dhe unë i thashë se nuk ke nevojë të jesh i shqetësuar, sepse nëse është gjyq i drejtë ti do të jesh i lirë për shkak të mungesës së provave”, ka deklaruar Bosch, raporton Podujeva Sot.

Ai ka theksuar se gjyqi nuk doli të jetë aq serioz sa kishte pritur. “Fatkeqësisht kisha qenë gabim, se gjyqi nuk doli të jetë aq serioz aq sa unë kisha pritur të ishte. Sepse, siç e mbani mend, raportin e Dick Martyt i cili fliste për trafikim të organeve, edhe pse ai dy herë kishte dalë që ishte i pambështetur, Këshilli Evropës e shtyu përpara agjendën për krijimin e kësaj Gjykate”, ka pohuar ai.

Në Hagë, një numër i madh protestuesish janë mbledhur sot për të kërkuar drejtësi për ish-udhëheqësit e Ushtrisë Çlirimtare të Kosovës, të cilët po mbahen në paraburgim në një proces të stërzgjatur dhe shumë të kritikuar gjyqësor, raporton Podujeva Sot.