Rrokulliset traktori, një person humb jetën

Një ngjarje e rëndë është raportuar mbrëmjen e djeshme në fshatin Presek – Zubin Potok, ku një burrë është gjetur i vdekur pas një aksidenti me traktor.

Burime të Sinjalit bëjnë të ditur se rreth orës 20:30 është raportuar se një traktor ishte rrokullisur dhe vozitësi kishte mbetur i bllokuar nën të, pa shenja jete.

Në vendin e ngjarjes kanë dalë njësitë patrulluese, hetuesit, zjarrfikësit dhe autoambulanca. Mjeku ka konstatuar vdekjen e viktimës V.K. rreth 67-vjeçar.

Me urdhër të Prokurorit të Shtetit, trupi i pajetë është dërguar në Institutin e Mjekësisë Ligjore për obduksion, ndërsa rasti është iniciuar si “Vdekje e dyshimtë”.

Hetimet për zbardhjen e plotë të rrethanave po vazhdojnë nga njësitë rajonale të Mitrovicës së Veriut.