Djali sulmon nënën dhe vetëlëndohet me thikë

Një rast i rëndë dhune në familje është raportuar mbrëmjen e djeshme në fshatin Vitomiricë – Pejë, ku një 29-vjeçar ka ushtruar dhunë ndaj nënës së tij dhe më pas është vetëlënduar.

Burime të Sinjalit bëjnë të ditur se më 14 shtator 2025, rreth orës 20:00, i dyshuari fillimisht ka sulmuar fizikisht nënën e tij, ndërsa më pas ka dëmtuar edhe gjësendet brenda shtëpisë.

Sipas deklarimit të viktimës, i dyshuari më pas ka lënduar veten duke goditur këmbën e majtë me një mjet të mprehtë, dyshohet thikë. Atij i është ofruar trajtim mjekësor, ndërsa pas trajtimit është shoqëruar në Stacionin Policor të Pejës për procedura të mëtejme.

Në vendin e ngjarjes ka dalë edhe njësia e hetimeve, por mjeti i dyshuar nuk është gjetur.

Një dëshmitar, familjar i të dyshuarit, ka deklaruar se ai është i diagnostikuar nga specialistët me sëmundje dhe paraqet rrezik të përhershëm për familjen.