Ekskluzive: Suspendohet zyrtarja policore

Kjo është zyrtarja policore që është suspenduar nga detyra në kuadër të Njësisë për Hetimin e Krimeve të Luftës në Policinë e Kosovës. Bëhet fjalë për Lumnije Behlulin, e cila ka ushtruar funksionin e hetueses në këtë njësi.

Sipas burimeve të Gazetës Sinjali, Behluli, me gradën rreshter, është pezulluar nën dyshime serioze për përfshirje në veprimtari të kundërligjshme, me theks të veçantë në veprën penale të spiunazhit, raporton Podujeva Sot.

Hetimi ndaj saj lidhet me dyshime për shkelje të rëndë të sigurisë dhe besueshmërisë brenda Policisë së Kosovës, çka ka bërë që të largohet nga pozita operative në të cilën ka qenë e angazhuar.

Gazeta Sinjali ka kërkuar përgjigje zyrtare nga Policia prej disa ditësh, për të ditur nëse rasti po trajtohet brenda institucionit apo është dërguar në Prokurori, dhe nëse veprimtaria e saj ka rrezikuar hetimet e krimeve të luftës. Megjithatë, deri në momentin e publikimit të këtij shkrimi, Policia nuk ka kthyer ndonjë përgjigje zyrtare, raporton Podujeva Sot.

Shënim: Personi i përmendur në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.