Të shtëna me armë në një aheng – Për çfarë dyshohen katër policët e arrestuar?

Inspektorati Policor i Kosovës (IPK) ka arrestuar 4 zyrtarë policorë në Mitrovicë nën dyshimin nën dyshimin për fshehje dhe manipulim të provave.

KALLXO.com mëson se policët e arrestuar janë pjesë e Njësitit të Reagimit brenda stacionit policor Mitrovicë Jug dhe ata janë Qëndrim Krasniqi, Besnik Mustafa, Labinot Ternava e Fatjon Ademi.

Siç mëson KALLXO.com ata po dyshohen për manipulim me prova në një rast të të shtënave me armë në një aheng.

Rasti ka ndodhur më 13.09.2025.

Policia kishte pranuar një telefonatë se në një villë në një fshat të Mitrovicës janë dëgjuar disa të shtëna me armë dhe kishte muzikë të lartë.

Policët i ishin përgjigjur telefonatës, kishin shkuar në vendin e ngjarjes, me ç’rast kishin kontaktuar personin që ka organizuar festën dhe e kanë pyetur se a keni shtënë me armë zjarri e personi e kishte mohuar.

E tutje siç mëson KALLXO.com, policët nuk e kanë proceduar rastin edhe pse tre deshmitarë që kanë qenë pjesëmarrës në ndejë kanë deklaruar se zyrtarët policorë kanë gjetur gëzhoja të armës.

Zyrtarët policorë pretendohet se nuk e kanë kërkuar armën, nuk kanë kërkuar tutje edhe për personat që potencialisht kishin shkrepur me armë zjarri.

Madje policët dyshohet se fare nuk kishin kërkuar për dëshmitarët e madje i ishin larguar të gjitha procedurave duke anashkaluar edhe regjistrimin e rastit apo gjetjen e gëzhojave.

E për këto çështje ata që ishin në ndejë siç mëson KALLXO.com kanë dëshmuar se policët edhe kanë gjetur gëzhojat, edhe kanë komunikuar me policët.

Deri më tani provat që rëndojnë mbi policët janë për manipulim me prova.

Në bazë të vendimit për ndalim katër policët janë dërguar në qendra të ndryshme të ndalimit për 48 orë.

Katër policët u arrestuan nga Inspektorati Policor i Kosovës pasi dyshohen për manipulim të provave.

Sipas IPK-së, më 13.09.2025 të njëjtit nuk kanë proceduar me rast penal në një rast të – shkaktimit të rrezikut të përgjithshëm, si dhe dyshohet se kanë fshehur si dhe kanë manipuluar me provat e gjetura në vendin e ngjarjes.