Ekskluzive: Ky është personi i arrestuar në Aeroportin e Prishtinës

Gazeta Sinjali mëson ekskluzivisht për një rast të rëndë që ka ndodhur në Mitrovicë, kur një person kishte tentuar të shkaktonte zjarrvënie në një market, duke rrezikuar seriozisht sigurinë publike.

Ngjarja kishte ndodhur më 18 gusht të këtij viti, rreth orës 06:00 të mëngjesit, në rrugën “Mbretëresha Teutë” në Mitrovicën e Jugut. I dyshuari, i identifikuar si Qlirim Begu, rreth 26-vjeçar, kishte goditur derën e marketit “QTA” me një bllok betoni dhe, pasi kishte thyer xhamin, kishte hedhur brenda një shishe molotovi, me qëllim që ta digjte objektin.

Fatmirësisht, në atë kohë brenda marketit nuk kishte qenë askush nga punëtorët, ndërsa një kalimtar i rastit kishte arritur ta lokalizojë zjarrin dhe të njoftojë policinë, duke shmangur një tragjedi të mundshme.

Njësitet relevante të Policisë së Kosovës kishin dalë menjëherë në vendin e ngjarjes, ndërsa me urdhër të Prokurorit të Shtetit ishte iniciuar rasti “Shkaktim i rrezikut të përgjithshëm”.

Pas veprimeve hetimore të zhvilluara nga Njësia e Hetimeve Rajonale Mitrovicë – Jug, në koordinim me prokurorin, autoritetet arritën të identifikojnë Begun si person të dyshuar, ndaj të cilit ishte lëshuar urdhër arresti.

Hetimet për këtë rast të rëndë vazhdojnë, ndërsa organet e drejtësisë pritet të vendosin për hapat e mëtejmë kundrejt të dyshuarit.

Shënim: Personat e apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.